STEP.ai ծրագիրը, որպէս փորձնական ծրագիր սկիզբ առած է 2022-ին: Նպատակն է աջակցիլ Հայաստանի դպրոցներէն ներս STEM կրթութեան տարածման աշխատանքներուն: 

Վերջին երկու տարիներու ընթացքին STEP.ai ծրագիրին միացած են 10-12-րդ կարգերու աշակերտները՝ հայկական 7 դպրոցներէն եւ արհեստական ​​բանականութեան հիմունքներուն ծանօթանալու առիթը ունեցած են: Նշենք, որ STEP.ai ծրագիրը մշակուած է արհեստական բանականութեամբ հետաքրքրուողներուն համար, անխկախ իմացութեան մակարդակէ:  

Հետեւեալ հարցազրոյցի ընթացքին, ուսանողնրը յայտնեցին իրենց կարծիքը եւ խօսեցան արհեստական բանականութեան ազդեցութեան մասին:

• Այս ծրագիրը ձեզի ինչո՞ւ հետաքրքրեց:

«Ես կ'ուզէի գիտնալ, թէ արհեստական ​​բանականութիւնը ինչպէ՞ս կը մտածէ,  մարդիկ ինչպէ՞ս կրնան պատկերներ կամ բազմաթիւ ծրագիրներ ստեղծել: Կ'ուզէի գիտնալ, թէ արհեստական ​​բանականութիւնը ինչպէ՞ս կրնայ դիւրացնել մարդոց կեանքը»: - Էլեն Թադէոսեան, Երեւանի պետական ​​համալսարանի STEM աւագ դպրոց

«Ես արհեստական ​​բանականութեամբ սկսայ հետաքրքրուիլ, երբ դեռ ԹՈՒՄՈ կը յաճախէի։ Ուզեցի խորացնել գիտելիքներս եւ հասկնալ, թէ ինչպէ՞ս կրնանք արհեստական ​​բանականութիւնը օգտագործել առօրեայ կեանքի խնդիրները լուծելու համար»։ - Յովհաննէս Բաղրամեան, Երեւանի պետական ​​համալսարան, STEM աւագ դպրոց

«Ես որոշեցի միանալ արհեստական ​​բանականութեան դասընթացքին, քանի որ անհրաժեշտ է իմ ապագայ մասնագիտութեանս համար: Ինծի համար դասերը այնքան ալ դժուար չէին, ես արդէն գիտէի C++։ Դասերը շատ հաճելի են եւ հետաքրքրական»։ - Արիս Ղուկասեան, Մխիթար Սեբաստացի կրթահամալիր

«Այս դասընթացքին մասնակցեցայ, որովհետեւ հետաքրքրուած եմ տեղեկատուական ճարտարագիտութեամբ։ Մասնակցիլը ճիշդ որոշում էր. ուրախ եմ»։ - Լիլիթ Ասլանեան, Երեւանի թիւ 112 աւագ դպրոց

• Կրնա՞ք յիշել հետաքրքրական տեղեկութիւն մը՝ արհեստական բանականութեան մասին:

«Ինծի համար ամէնէն հետաքրքրական տեղեկութիւնն այն է, որ արհեստական ​​բանականութիւնը կրնայ կատարելագործուիլ՝ առանց ծրագրաւորման, փորձի հիման վրայ»։ - Յովհաննէս Բաղրամեան, Երեւանի պետական ​​համալսարանի STEM աւագ դպրոց

«Ամէն ինչ հետաքրքրական է։ Հիանալի ոլորտ է. մեծ ազդեցութիւն ունի իմ ապագայ մասնագիտութեանս վրայ»։ - Լիլիթ Ասլանեան, Երեւանի թիւ 112 աւագ դպրոց

• Նշեցէք այնպիսի խնդիր մը, որ լուծելու համար կը նախընտրէք դիմել արհեստական բանականութեան օգնութեան:

«Ես արհեստական ​​բանականութեան օգնութեան կը դիմէի կրթութեան  ոլորտի մէջ՝ իւրաքանչիւր աշակերտի կարողութեան համապատասխան ուսուցում ապահովելու համար, որպէսզի ուսումնառութիւնը դառնայ աւելի արդիւնաւէտ եւ գրաւիչ:  Արհեստական բանականութիւնը կ'օգտագործէի նաեւ  արդիւնաբերութեան մէջ՝ մեր երկրի զարգացումը խթանելու համար»։ - Յովհաննէս Բաղրամեան, Երեւանի պետական ​​համալսարանի STEM աւագ դպրոց

« Արհեստական ​​բանականութիւնը կ'օգտագործէի առողջապահութեան մէջ, որովհետեւ շատ արագ կրնայ վերլուծել մեծ քանակով տուեալներ։ Արհեստական բանականութեան շնորհիւ բժիշկները կրնան արագ ախտորոշել հիւանդութիւնները եւ  ճշգրիտ բուժում նշանակել»։ - Տիանա Միրզոյեան, Մայր Աթոռ Սուրբ Էջմիածնի Էօրնէկեան դպրոց

«Պատերազմի ատեն ես կը նախընտրէի, որ զինուորներու փոխարէն ռոպոթները կռուին, որպէսզի մարդիկ չզոհուին եւ իրենց կեանքը չկործանուի»: - Էլեն Թադէոսեան, Երեւանի պետական ​​համալսարանի STEM աւագ դպրոց

• Արհեստական բանականութիւնը ինչպիսի՞ ազդեցութիւն կրնայ ունենալ մարդոց կեանքի վրայ, ինչպէ՞ս կրնայ փոխել մեր առաօրեայ կեանքը:

«Արհեստական ​​բանականութիւնը կրնայ դիւրացնել մեր կեանքը տարբեր ոլորտներու մէջ, օրինակ՝ բժշկութեան ոլորտի մէջ։ Կրնայ օգնել մարդոց, որպէսզի արագ եւ ճիշդ որոշումներ առնեն»: - Նինա Եազճեան, Մայր Աթոռ Սուրբ Էջմիածնի Էօրնէկեան դպրոց

«Կը կարծեմ, որ արհեստական բանականութիւնը շուտով պիտի գրաւէ մարդոց առօրեայ կեանքի մօտաւորապէս 90 տոկոսը. մարդիկ կախեալ պիտի ըլլան արհեստական բանականութենէն: Օրինակ, շատեր արդէն կախուած են  ChatGPT-էն: Արդեօ՞ք  արհեստական ​​բանականութեան կարողութիւնները պիտի գերազանցեն մարդու ունեցած կարողութիւնները: Թերեւս..., բայց կը կարծեմ, որ մարդիկ պիտի փորձեն կանխել այդ մէկը»։ - Վազգէն Գինոսեան, «Մխիթար Սեբաստացի» կրթահամալիր

«Ես կը կարծեմ, որ մենք կրնանք ունենալ զարգացած եւ լաւ ապագայ եթէ արհեստական ​​բանականութիւնը ճիշդ  օգտագործենք։ Բայց, եթէ չափը անցընենք,  այդ պարագային մարդոց միտքը կը  փոխարինուի արհեստական ​​բանականութեամբ, որ անշուշտ լուրջ փորձանքի կրնայ վերածուիլ»։ - Լիլիթ Ասլանեան, Երեւանի թիւ 112 աւագ դպրոց

• Ի՞նչ խորհուրդ կու տաք այն աշակերտներուն, որոնք կը փափաքին հետեւիլ արհեստական բանականութեան:

   

«Թուաբանութիւն, յատկապէս՝ հանրահաշիւ թող սորվին։ Անշուշտ թող սորվին նաեւ  ծրագրաւորման լեզու, օրինակ՝ Python»։ - Միքայէլ Չիպուխչեան, Երեւանի N112 աւագ դպրոց

«Պէտք է խորանան թուաբանական գիտելիքներու մէջ եւ զարգացնեն տրամաբանական մտածողութիւնը: Առաւել, ըլլան պատասխանատու եւ աշխատասէր»։ - Յովհաննէս Բաղրամեան, Երեւանի պետական ​​համալսարանի STEM աւագ դպրոց

«Այն աշակերտները, որոնք կը փափաքին հետեւիլ արհեստական ​​բանականութեան, անպայման թող միանան STEP.ai ծրագիրին։ Եթէ հետաքրքրուած էք այս ոլորտով, միշտ աշխատեցէ՛ք եւ հակառակ դժուարութիւններուն,  երբեք մի՛ յուսահատիք:Արհեստական բանականութիւնը կրնայ լաւ գործիք դառնալ   նոր բան ստեղծելու եւ մեր հակառակորդներուն դէմ պայքարելու համար»։ - Լիլիթ Ասլանեան, Երեւանի թիւ 112 աւագ դպրոց

Հարցազրոյցը ուրախ եւ պարզ հարցումով մը աւարտելու համար, դպրոցի աշակերտներուն հարցուցինք, թէ ըստ իրենց, ի՞նչ է արհեստական բանականութեան գոյնը:  Ուսանողներուն մեծ մասը ըսաւ, թէ հաւանաբար բաց կապոյտ է: STEM աւագ դպրոցի աշակերտ Յովհաննէս Բաղրամեան այսպէս նկարագրեց. «Խաղաղ երկինքի գոյնն է եւ կը խորհրդանշէ անսահման հնարաւորութիւններ»:

Իսկ Մխիթար Սեբաստացի կրթահամալիրի աշակերտուհիներէն Մանէ Խաչատրեան ըսաւ. «Սեւ է, քանի որ բնութեան մէջ սեւ գոյն չկայ եւ արհեստական ​​բանականութիւնը ստեղծուած է մարդոց կողմէ»։

STEP.ai ծրագիրը արդիւնքն է  Synopsys հիմնադրամի, AGBU Silicon Valley մասնաճիւղի, Տեղեկատուական եւ հաղորդակցութեան տեխնոլոկիաներու գործատուներու միութեան (UEICT), Synopsys Armenia-ի կրթական վարչութեան եւ ՀԲԸՄ Հայկական Համացանցային Համալսարանի (ՀՀՀ) համագործակցութեան։