Ճատրակի համահայկական 3-րդ ճամբարն ու մրցաշարքը, որ տեղի ունեցաւ Յուլիս 24-Սեպտեմբեր 2, մեծ յաջողութիւն արձանագրեց:  

Փակման արարողութեան ներկայ էին պատուաւոր հիւրեր Ճատրակի միջազգային ֆետերացիայէն (FIDE), ՀԲԸՄ-ի Հայկական Համացանցային Համալսարանէն, Հայաստանի ճատրակի ակադեմիայէն, մեծ թիւով ճատրակորդներ եւ ճատրակի աշխարհի 13-րդ ախոյեան Կարի Գասպարովի նման աշխարհահռչակ դէմքեր: 

Մրցանակակիրներու անունները յայտարարուեցաւ փակման արարողութեան ընթացքին: Այսպէս.  

•  առաջին դիրքը գրաւեց՝ Արգիշտի Ոսկանեան, 15տ․, Ռուսիա
•  երկրորդ  դիրքը գրաւեց՝ Կարէն Եսայեան, 12տ․, Հայաստան
•  երրորդ դիրքը գրաւեց՝ Ռաֆիկ Քալճեան, 18տ․, Հայաստան

Մրցանքի յաղթողներն ու աշխոյժ մասնակիցները վկայականներ եւ մրցանակներ  ստացան։

ՀԲԸՄ-ի Հայկական Համացանցային Համալսարանի (ՀՀՀ) եւ Հայաստանի ճատրակի ակադեմիայի կողմէ կազմակերպուած Ճատրակի համահայկական 3-րդ ճամբար-մրցաշարքը համախմբեց 8-18 տարեկան շուրջ 340 հայ պատանի՝ 20 երկրէ։ 

ՀԲԸՄ ՀՀՀ-ի հիմնադիր նախագահ, ՀԲԸՄ-ի Կեդրոնական վարչական ժողովի անդամ դոկտ․ Երուանդ Զօրեան ողջոյնի խօսքով դիմեց ներկաներուն. «Երկու տարի առաջ՝ համավարակի ընթացքին, նախաձեռնեցինք այս մրցաշարքը, մարդոց համախմբելու եւ հաղորդակցելու առիթ տալու միտումով»։ Ապա, անդրադառնալով ՀՀՀ-ի Ճատրակի համահայկական համայնքին, ըսաւ. «Այժմ մենք ունինք ճատրակի համահայկական համայնք, որ կազմուած է ճատրակ սիրող աւելի քան 1200 անդամներէ»: 

1985-2000 թուականներու ճատրակի աշխարհի ախոյեան Կարի Գասպարովը շեշտեց․ «Ես շատ ուրախ եմ, որ այս մրցաշարքին ճատրակ սիրող մեծ թիւով հայ պատանիներ կը մասնակցին: Հայ ժողովուրդը պատմութեան ընթացքին միշտ պայքարած եւ գոյատեւած է իր մտաւոր արժէքներուն շնորհիւ. կը կարծեմ, որ այսպիսի մրցանքի մասնակցիլը շատ կարեւոր է: Այսպիսի մրցաշարքեր ցոյց կու տան, որ ոչինչ կրնայ դէմ կենալ հայ ժողովրդին՝ զարգացնելու իր իմացական արժէքները»:  

FIDE-ի փոխնախագահ Միխայիլ Խոդարկովսկին նշեց․ «Ինծի համար մեծ պատիւ է ներկայ գտնուիլ այսպիսի ձեռնարկի եւ շնորհաւորել յաջողութիւնները: Հայ ճատրակորդները միշտ փայլուն դիրք կը գրաւեն աշխարհի երիտասարդական եւեւրոպական մրցանքներուն, ինչպէս նաեւ ճատրակի աշխարհի ողիմպիականին»: 

Հայաստանի ճատրակի ակադեմիայի հիմնադիր նախագահ, FIDE-ի «Ճատրակը կրթութեան մէջ» յանձնաժողովի նախագահ Սմբատ Լպուտեանն ըսաւ. «Խորին շնորհակալութիւն Հայկական Համացանցային Համալսարանին, որ արդէն 3-րդ տարին ըլլալով մեծ սիրով եւ մեծ ցանկութեամբ մեր երեխաներուն համար կ'իրականացնէ այս կարեւոր եւ հետաքրքրական մրցաշարքը։ Ճատրակի ակադեմիան մեծ ուրախութեամբ կը համագործակցի ՀՀՀ-ի հետ. այդ համագործակցութիւնը միշտ արդիւնաւէտ եղած է»:

Ճատրակի մրցաշարքը տեղի ունեցաւ երկու հանգրուանով: Կիսաեզրափակիչ խաղերը ընթացան ըստ 4 տարածաշրջաններու՝ Հիւսիսային եւ Հարաւային Ամերիկա, Եւրոպա եւ Ռուսիա, Միջին Արեւելք, Ափրիկէ, Ասիա եւ Ովկիանիայի երկրներ, Հայաստան եւ Արցախ։ Լաւագոյն 20 մասնակիցները անցան եզրափակիչ հանգրուան՝  մրցելու առաջին երեք դիրքերու համար:   

Մրցաշարքի մասնակիցները գոհ էին եւ շնորհակալ: Անոնք ուրախ էին, որ մասնակցելու, սորվելու, ճատրակորդներէն գիտելիքներ ստանալու եւ  նոր ընկերներու ծանօթանալու հնարաւորութիւնն ունեցան: 

Փակման արարողութեան ընթացքին, Հայաստանի ճատրակորդ Մանուէլ Պետրոսեանն ու Սամուէլ Տէր-Սահակեանը իրարու հետ ճատրակ խաղցան:  Ապա, տեղի ունեցաւ ընդհանուր զարգացման խաղ մը եւ ճիշդ պատասխաններով հանդէս եկողները մրցանակներ շահեցան: 

Ճատրակի համահայկական 3-րդ ճամբար-մրցաշարքը համախմբեց աշխարհի տարածքի ճատրակասէր հայ պատանիները՝ նպաստելով այս խաղի կրթութեան զարգացմանն ու տարածմանը: Համոզուած ենք, որ այս մրցաշարքը յառաջիկայ տարիներուն եւս մեծ յաջողութիւններ պիտի արձանագրէ: 

Ճատրակի համահայկական 3-րդ ճամբար-մրցաշարքի տեսանիւթը կրնաք այստեղ տեսնել։