Շախմատի համահայկական 3-րդ ճամբարը և մրցաշարն անցկացվեց առցանց օգոստոսի 26-ից սեպտեմբերի 2-ը։ Մրցաշարն ամփոփվեց հանդիսավոր արարողությամբ, որի ընթացքում հայտարարվեցին տարածաշրջանի կիսաեզրափակիչի մասնակիցների ու մրցաշարի հաղթողների անունները:
Փակման միջոցառմանը ներկա էին պատվավոր հյուրեր՝ Շախմատի միջազգային ֆեդերացիայից (ՖԻԴԵ), ՀԲԸՄ Հայկական վիրտուալ համալսարանից (ՀՎՀ), Հայաստանի շախմատի ակադեմիայից, Հայաստանի շախմատի չեմպիոններ և աշխարհահռչակ գրոսմայստերներ, ինչպես շախմատի աշխարհի 13-րդ չեմպիոն Գարի Կասպարովը։
Մրցաշարի հաղթողների անունները հայտարարվեցին փակման արարողության ընթացքում, որից հետո մասնակիցների համար կազմակերպվեց ինտերակտիվ խաղ-վիկտորինա։ Մրցաշարի հաղթողներն էին․
- առաջին մրցանակակիր՝ Արգիշտ Ոսկանյան, 15տ․, Ռուսաստան ,
- երկրորդ մրցանակակիր՝ Կարեն Եսայան, 12տ․, Հայաստան,
- երրորդ մրցանակակիր՝ Ռաֆիկ Կալիջյան, 18տ․, Հայաստան։
Հաղթողները և մրցաշարի ակտիվ մասնակիցները ստացան վկայականներ և մրցանակներ։
Շախմատի համահայկական 3-րդ ճամբար-մրցաշարը համախմբեց 8-18 տարեկան շուրջ 340 հայ պատանիներ՝ 20 երկրից։ Այն նախաձեռնվել է ՀԲԸՄ հայկական վիրտուալ համալսարանի (ՀՎՀ) և Հայաստանի շախմատի ակադեմիայի կողմից։
Իր բացման խոսքում դոկտ․ Երվանդ Զորյանը՝ ՀԲԸՄ ՀՎՀ-ի հիմնադիր նախագահ և ՀԲԸՄ կենտրոնական վարչության անդամ, ասաց․ «Երկու տարի առաջ՝ համավարակի ընթացքում, մենք նախաձեռնեցինք այս մրցաշարը՝ մարդկանց համախմբելու և միմյանց հետ հաղորդակցվելու հնարավորություն տալու համար»։ Առաջին մրցաշարից հետո ՀՎՀ-ի կրթական առցանց հարթակում ստեղծվեց շախմատի համահայկական համայնք։ «Այժմ մենք ունենք շախմատի համահայկական համայնք, որը կազմված է շախմատ խաղի սիրահար ավելի քան 1200 անդամից»,-հավելեց դոկտ․ Զորյանը։
Միջոցառման պատվավոր հյուր, 1985-2000 թվականների շախմատի աշխարհի չեմպիոն Գարի Կասպարովը նշեց․ «Ես շատ ուրախ եմ, որ այս մրցաշարին մասնակցում են մեծ թվով շախմատասեր հայ պատանիներ։ Մեր ազգն իր երկարամյա դժվարին պատմության ընթացքում միշտ պայքարել և գոյատևել է իր մտավոր արժեքների շնորհիվ։ Եվ կարծում եմ, որ ինտելեկտուալ հրաշալի մրցաշարին ձեր մասնակցությունը շատ կարևոր է։ Այն ցույց է տալից, որ ոչինչ չի կարող կանգնեցնել հայ ժողովրդին իր ինտելեկտուալ արժեքները զարգացնելու և առաջ շարժվելու ճանապարհին»։
ՖԻԴԵ-ի փոխնախագահ Միխայիլ Խոդարկովսկին հավելեց․ «Ինձ համար մեծ պատիվ է ներկա լինել այս միջոցառմանը և շնորհավորել ձեզ այս հաջողությունների համար։ Հայ շախմատիստները միշտ փայլել են աշխարհի երիտասարդական և եվրոպական առաջնություններում, ինչպես նաև շախմատի աշխարհի օլիմպիադայում»։
Հաջորդիվ ողջույնի խոսքով ելույթ ունեցավ Սմբատ Լպուտյանը՝ գրոստմայստեր, Հայաստանի շախմատի ակադեմիայի հիմնադիր նախագահ, ՖԻԴԵ-ի՝ «Շախմատը կրթության մեջ» հանձնաժողովի նախագահ։ «Ուզում եմ խորին շնորհակալություն հայտնել Հայկական վիրտուալ համալսարանին, որ արդեն 3-րդ տարին է՝ մեծ սիրով և մեծ ցանկությամբ իրականացնում է այդքան հետաքրքիր և շատ կարևոր մրցաշարը մեր երեխաների համար։ Շախմատի ակադեմիան մեծ ուրախությամբ է համագործակցում ՀՎՀ-ի հետ։ Եվ մեր համագործակցությունը միշտ շատ արդյունավետ է եղել»,- ասաց պարոն Լպուտյանը։
Շախմատի մրցաշարը բաղկացած էր երկու փուլից։ Կիսաեզրափակիչ խաղերն ընթացան՝ ըստ 4 տարածաշրջանների՝ Հյուսիսային և Հարավային Ամերիկա, Եվրոպա և Ռուսաստան, Միջին Արևելք, Աֆրիկա, Ասիա և Օվկիանիայի երկրներ, Հայաստան և Արցախ։ Արդյունքում 20 լավագույնները մրցեցին եզրափակչում՝ առաջին երեք հաղթական տեղերի համար։
Մրցաշարի մասնակիցներն իրենց շնորհակալությունը հայտնեցին կազմակերպիչներին՝ մասնակցելու հնարավորության համար։ Նրանք ավելացրին, որ մրցաշարի շնորհիվ ձեռք բերեցին նոր հմտություններ, ինչպես նաև նոր ընկերներ։
Փակման արարողության ընթացքում Հայաստանի շախմատի գրոստմայստերներ Մանուել Պետրոսյանը և Սամվել Տեր-Սահակյանը արագ շախմատի մի պարտիա խաղացին ներկաների համար, իսկ վերջում մասնակիցները հնարավորություն ունեցան մասնակցել խաղ-վիկտորինայի։
Շախմատի համահայկական 3-րդ ճամբար-մրցաշարը համախմբեց շախմատասեր հայ պատանիներին ամբողջ աշխարհից՝ նպաստելով շախմատ խաղի կրթության զարգացմանը և տարածմանը։ Վստահաբար մրցաշարը դեռ հաջողություններ կարձանագրի գալիք տարիների ընթացքում։
Դիտեք Շախմատի համահայկական 3-րդ ճամբար-մրցաշարի թրեյլերը այստեղ։
