ՀԲԸՄ-ի Հայկական համացանցային համալսարանի  (ՀՀՀ) եւ Օսթինի Համաշխարհային յարաբերութիւններու խորհուրդի գիտնականներու տիպլոմային ծրագիրի համագործակցութիւնը տուաւ իր առաջին արդիւնքը:   2021-2022 ուսումնական տարեշրջանին, Տէլ Վալէի երկրորդական վարժարանէն 20 աշակերտ  հետեւեցան ՀՀՀ-ի Հայոց պատմութեան դասընթացքին:  Անոնցմէ 6 աշակերտ Հայոց պատմութեան ամբողջ ծրագիրը աւարտեց եւ ՀՀՀ-ի վկայականին արժանացաւ:

18 Մայիս, 2022-ին, տեղի ունեցաւ մրցանակաբաշխումի առցանց արարողութիւնը, ներկայութեամբ  ՀՀՀ-ի հիմնադիր նախագահ դոկտ. Երուանդ Զօրեանի, ՀՀՀ-ի Գործառնական բաժինի տնօրէն՝ Արփինէ Թաւաքալեանի եւ աւագ հեռավար ուսուցիչ՝  Անի Տեկիրմէնճեանի: Վերջինս, ուսուցման ընթացքին, աշակերտները առաջնորդեց իր ցուցմունքներով եւ խորհուրդներով:

ՀՀՀ-ի Պատմութեան դասընթացքը միջազգային կրթութեան եւ ցեղասպանութեան իրազեկման ծրագիրին մէկ մասն է, որ սկիզբ առած է Օգոստոս 2021-ին, ՀՀՀ-ի եւ  Օսթինի Համաշխարհային յարաբերութիւններու խորհուրդի համատեղ ջանքերով: 2021-ի Սեպտեմբերէն ի վեր միջազգային երեք դպրոց մասնակցած է այս ծրագիրին եւ    ծանօթացած է հայ ժողովուրդի պատմութեան:

ՀՀՀ-ի կրթական ծրագիրի առաջնորդութեան եւ  ցեղասպանութեան իրազեկման ծրագիրին աջակցելուն առթիւ, Դոկտ. Զօրեանին Օսթինի պատուաւոր քաղաքացիութիւնը կը շնորհուի: Ան կը ստանայ նաեւ մրցանակ եւ հաստատող գիր ԱՄՆ-ի  ծերակուտական՝  Թետ Քրուզէն եւ Արիզոնայի ու Միչիկընի նահանգապետներէն:  Առ ի գնահատանք իրենց մատուցած ջանքերուն, Արփինէ Թաւաքալեանն ու Անի Տեկիրմէնճեանն ալ մրցանակ կը ստանան:

Դոկտ. Զօրեան երախտիքով կ'անդրադառնայ այս համատեղ գործակցութեան, նշելով. « Պատմութիւնը ճանչնալը, հասկնալը եւ հոնկէ դասեր քաղելը շատ կարեւոր է: Հայոց պատմութիւնը համաշխարհային պատմութեան մէկ մասն է: Ես կը կարծեմ, որ աշակերտները  իսկապէս կը գնահատեն իրենց վարժարանի՝  Օսթինի Համաշխարհային յարաբերութիւններու խորհուրդի եւ  ՀԲԸՄ-ի հայկական համացանցային համալսարանի ընձեռած հնարաւորութիւնը»:

Ապա կը շնորհաւորէ աշակերտները, որոնք արդէն դարձած են ՀՀՀ-ի աշխարհատարած ուսանողներու ընտանիքի անդամները:

 
Օսթինի Համաշխարհային յարաբերութիւններու խորհուրդի գիտնականներու տիպլոմային ծրագիրի տնօրէն, ՀՀՀ-ի շրջանաւարտ Մայքլ Քանինկհեմը իր նուիրումին եւ ջանքին համար կը ստանայ ՀՀՀ-ի դեսպանի կոչումը: